慳家煮食日誌終於衝出去，登登～做甜品！其實一直唔鍾意整甜品，係事緣某年做了一個生日蛋糕比另一半，但之後搞到自己又痾又嘔(但另一半竟然係無事⋯⋯簡直係鐵腸胃！)，之後就將所有整蛋糕的器具送哂比人～
多年後的今日終於突破下自己，整左長洲版芒果糯米磁，何謂長洲版呢？可能有d讀者唔係咁清楚，係因為長洲度賣的糯米磁係特別大粒架，有成隻手掌咁大架！當然包的時候係難度高d啦～
食材(四人份):
芒果2個($17)
生糯米粉100克(約$3)
熟糯米粉50克(約$2)
生粉20克(約$2)
砂糖25克(約$2)
牛奶110克(約$5)
椰漿65克(約＄5)
菜油5克(約＄1)
做法:
(1) 首先整熟的糯米粉，把50克的生糯米粉用白鑊炒熟，5分鐘不停炒，直至糯米粉有少少變黃色，放在一邊備用。然後把其他的生糯米粉，生粉，砂糖隔篩。
(2) 倒入牛奶及椰漿，不停攪至沒有粉粒，再落菜油
(3) 塗一些油在蛋糕模內，隔篩倒入糯米粉漿
(4) 在枱面櫈一櫈，放裡面的空氣放出，然後包錫紙，放入蒸爐蒸20分鐘(我的是蒸焗爐，所以加多5分鐘預熱)
(5) 這個時候可以切芒果，把兩邊的芒果切開，然後用匙羹挑起成塊芒果肉出來。中間的那片切下來的芒果肉可以自己食左佢 ：）然後用廚房紙印乾汁液。
(6) 蒸好出來的糕攤凍一會兒，然後戴膠手套用手掌心的肉搓五分鐘，分成四舊糕團，用保鮮紙包著備用。
(7) 把其中一舊搓平至手掌大小，放入芒果肉，包好(用保鮮紙墊底來搓可以防止痴住)，然後灑上熟的糯米粉，完成！重覆三次這個步驟。
